taifaleo.nation.co.ke
@taifaleo Sat, 19 Sep 2026 05:55:34
Mwanachuo ashtaki Gavana Mutai akitaka Sh200,000 za malezi
GAVANA wa Kericho Dkt Eric Mutai ameshtakiwa mahakamani na mwanafunzi wa chuo kikuu akitaka aagize kumlipa Sh200,000 kila mwezi kwa matunzo ya mtoto wa mwaka mmoja anayesema alizaa naye. M.C, mwanafunzi wa mwaka wa nne katika Chuo Kikuu cha Kabianga, amemshutumu gavana huyo kwa kukwepa jukumu lake la mzazi kwa kukataa kutoa mahitaji ya mtoto huyo, ambaye anadai alizaliwa kutokana na uhusiano wao wa kimapenzi mwaka 2024. Bi M.C pia anataka Dkt Mutai ampe nakala ya kitambulisho chake cha kitaifa ili aweze kupata cheti cha kuzaliwa cha mtoto huyo. Katika stakabadhi zilizowasilishwa mahakamani, mwanafunzi huyo anasema yeye na Dkt Mutai walikuwa katika uhusiano wa kimapenzi mwaka 2024, ambao ulisababisha kuzaliwa kwa mtoto huyo Julai mwaka huo huko Kericho. Anadai amekuwa akilea na kutunza mtoto tangu kuzaliwa kwake na ndiye amekuwa akigharamia mahitaji yake bila msaada wa maana kutoka kwa gavana. Bi M.C anasema hana ajira wala chanzo cha mapato kwa sababu bado ni mwanafunzi na kwa sasa anategemea ndugu zake kumsaidia yeye na mtoto. Anadai kwamba juhudi zake za mara kwa mara za kumshawishi Dkt Mutai achangie mahitaji ya mtoto hazijafua dafu. "Katika matukio kadhaa tangu mtoto azaliwe, mlalamishi amelazimika kuwasiliana na kumsihi mshtakiwa achangie mahitaji ya mtoto, lakini mara kadhaa simu na jumbe zake hupuuzwa," inasema sehemu ya stakabadhi hizo. Kwa mujibu wa kesi hiyo, hali ilikuwa ngumu hadi Bi M.C akaondoka Kericho, ambako anaishi kwa kawaida, na kwenda kujisitiri nyumbani kwa dada yake huko Nakuru. Anasema dada yake amekuwa akimsaidia kupata mahali pa kuishi, chakula, matibabu na mahitaji mengine ya msingi akiwa na mtoto wake. Mwanafunzi huyo anadai pia kwamba kutokuwa na kitambulisho cha Dkt Mutai kumezuia mtoto kupata cheti cha kuzaliwa. Anasema hali hiyo imeathiri haki ya mtoto kupata uraia wa kutambuliwa nao. Kesi hiyo iliwasilishwa baada ya juhudi za wawili hao kufikia makubaliano kuhusu matunzo ya mtoto kushindikana. Bi M.C anasema baada ya kumtumia gavana barua ya kumtaka awajibike na kumjulisha kuhusu hatua za kisheria alizokuwa akizingatiwa, Dkt Mutai aliwasiliana naye akitaka suala hilo litatuliwe nje ya mahakama. Kwa mujibu wa mwanafunzi huyo, gavana alipendekeza kutoa Sh25,000 kila mwezi kwa matunzo ya mtoto. Hata hivyo, alikataa kiasi hicho akise ma hakitoshelezi mahitaji halisi ya mtoto. Kupitia mawakili wake, Bi M.C baadaye aliandaa makubaliano ya kugawana majukumu ya malezi na kuyawasilisha kwa mawakili wa gavana. Anasema Dkt Mutai aliwasilisha kesi katika mahakama ya hakimu Nakuru akimshutumu kwa kumzuia kumwona mtoto na kutofichua alikokuwa. Bi M.C amekanusha madai hayo. Anasema Dkt Mutai hajawahi kuonyesha nia ya kumwona mtoto tangu azaliwe wala kufanya juhudi za kupata taarifa kuhusu afya yake, alipo au hali yake kwa jumla. Anadai pia kuwa wakati mmoja alimpeleka mtoto katika makazi ya gavana akitarajia kupata msaada wa matunzo, lakini Dkt Mutai alikataa kumwona au kumshika mtoto huyo. Kulingana na madai yake, baadaye alikatazwa kurejea katika makazi hayo. Mwanafunzi huyo sasa anataka mahakama iamue kwamba haki za mtoto zimekiukwa na iamuru Dkt Mutai kulipa Sh200,000 kila mwezi kwa matunzo yake. Pia anataka gavana huyo awajibikie bima kamili ya matibabu ya mtoto. Katika uamuzi wa Septemba 14, mahakama iliagiza Dkt Mutai akabidhiwe karatasi za kesi ili ajibu madai yaliyowasilishwa dhidi yake. Kesi hiyo itatajwa tena Septemba 28.
read moreOther Headlines
taifaleo.nation.co.ke
@taifaleo 50 minutes ago
Je, safari ya Sifuna kuingia ikulu imeanza kuyumba?
SIASA za upinzani nchini Kenya zimefika mahali ambapo umaarufu wake hauwezi tena kuficha madhaifu katika ngazi ya uongozi wake. Linda Mwananchi ilipoibuka, ilionyesha kusudi la kujenga kizazi kipya cha upinzani na kumweka Edwin Sifuna katika nafasi ya kuwania urais. Swali linabakia iwapo vuguvugu hili linajenga mashine ya uchaguzi au linazalisha vyama vya kuyeyusha nguvu zake? Mvutano kuhusu ni chama kipi cha kutumia katika uchaguzi wa 2027 unajenga ufa ulio wazi. Babu Owino anaegemea Mwananchi Party, huku George Natembeya akiunga mkono Ukombozi People's Party kama chombo cha Sifuna. Ripoti kinzani zinaonyesha Sifuna anatarajiwa kuzindua chama chake mwanzoni mwa Oktoba, naye Babu akielekeza nguvu zaidi katika Mwananchi Party na azima yake ya ugavana Nairobi. Lakini pia imetokea kwamba Kalonzo Musyoka amebadilisha muungano wa Azimio kuwa The Ukombozi Alliance. Hili ndilo donda la kisiasa linafyonza Linda Mwananchi. Uaminifu uko wapi? Muungano wa kisiasa hauhitaji makubaliano katika kila jambo ila lazima kuwe na msingi kuhusu nani anaongoza, chombo gani kinatumika na kila mmoja yuko tayari kutoa nini kwa ajili ya mradi wa pamoja. Ikiwa kila kiongozi anajenga chama chake, bila shaka kila chama kitakuwa na maslahi, wagombea, mtandao na mamlaka yake ya kibinafsi na kuhatarisha muungano huo. Urais haujengwi kwa umaarufu wa mikutano pekee. Unahitaji muundo wa kitaifa, wagombea katika maeneo mbalimbali, mawakala, rasilimali, ujumbe mmoja na makubaliano ya kisiasa yanayoweza kustahimili joto la uchaguzi. Historia ya Kenya imejaa mafunzo mazito kisiasa. Katika mwaka wa 1992, katika uchaguzi wa kwanza wa vyama vingi, wapinzani waligawanyika kila mmoja kwa tamaa yake huku Daniel arap Moi akipata ushindi wa rahisi dhidi ya wapinzani Kenneth Matiba, Mwai Kibaki na Jaramogi Oginga Odinga na wengine. Tatizo lilikuwa kugawanyika kwa nguvu hiyo ya upinzani miongoni mwa wagombea kadhaa. Huenda picha hiyo ya mwaka 1992 isijirudie 2027 kwani mazingira ya kisiasa ni tofauti lakini kanuni za kisiasa hazina tofauti: kura zilizogawanyika haziwezi kuhesabiwa kama kura moja wakati wa kuamua urais. Mgogoro unaokumba Linda Mwananchi si suala dogo la chama. Ni mjadala kuhusu mamlaka, urais na udhibiti wa mamlaka ya kisiasa. Babu anadai kumuunga mkono Sifuna, huku msimamo wake kuhusu Mwananchi Party ukiashiria picha kinzani. Sifuna ana kibarua cha pekee kuviunganisha vyama vyote vinavyochipuka ndani ya Linda mwananchi kwa makubaliano madhubuti ili kuepuka mgawanyiko unaoshuhudiwa sasa. Ni sharti ahakikishe majadiliano ya kina kuelekea kuimarisha muungano mpana wa Linda Mwananchi. Ikiwa kila mmoja ataendelea kujenga himaya yake, Sifuna atajikuta akiwa na jina, umaarufu na jukwaa bila asasi thabiti za kushindana kwenye uchaguzi. Hapo huenda ikawa ndipo mwanzo wa urais wake kubaki tu kuwa wazo lenye mvuto na msisimko maridadi kisiasa ambalo bado halijageuzwa kuwa mradi wa uchaguzi uliokamilika. Suala muhimu kwa sasa si kushabikia kuwa Linda Mwananchi ina watu wanaoishabikia bali kutathmini iwapo uongozi wake una uaminifu, nidhamu na umoja wa kutosha kuwageuza watu hao kuwa nguvu moja ya kisiasa.
read moretaifaleo.nation.co.ke
@taifaleo 1 hours ago
Korti yakataa kuzuia IEBC kuweka kituo cha kuthibitisha matokeo ya kura za urais
MAHAKAMA Kuu imeunga mkono uhalali wa Tume Huru ya Uchaguzi na Mipaka (IEBC) kujumlisha na kuthibitisha matokeo ya uchaguzi wa urais katika ngazi ya kitaifa. Jaji Gregory Mutai alikataa ombi la viongozi wa upinzani Kalonzo Musyoka, Rigathi Gachagua na Fred Matiang'i pamoja na mwanaharakati Okiya Omtatah Okoiti, waliopinga jukumu la IEBC katika Kituo cha Kitaifa cha Kuhesabu Kura. Walalamishi walidai kuwa matokeo ya urais yaliyotangazwa na kuthibitishwa na maafisa wa uchaguzi katika maeneo bunge ni ya mwisho na hayapaswi kuhesabiwa au kuthibitishwa tena katika ngazi ya kitaifa. Hata hivyo, Jaji Mutai alisema Katiba inataka IEBC kujumlisha na kuthibitisha matokeo hayo katika ngazi ya kitaifa ili kubaini iwapo mgombea ametimiza kiwango kinachohitajika kuchaguliwa kuwa Rais. "Jukumu la kujumlisha na kuthibitisha si kuingilia kinyume cha Katiba uamuzi wa mwisho wa maeneo bunge," Jaji alisema. Uamuzi huo umehifadhi Kituo cha Kitaifa cha Kuhesabu Kura, lakini ukaweka mipaka ya mamlaka ya IEBC. Tume inaweza kujumlisha na kuthibitisha takwimu zilizotangazwa katika maeneo bunge, lakini haina mamlaka ya kuzibadilisha, kuzifuta au kuzirekebisha isipokuwa kwa amri ya mahakama. Mahakama pia ilisema jukumu hilo ni la IEBC kwa pamoja na si la mwenyekiti pekee. Jaji Mutai alisema matokeo yaliyothibitishwa katika maeneo bunge, yakiwemo yaliyo katika Fomu 34A na 34B au fomu zitakazochukua nafasi ya hizo, ndiyo yatakayokuwa msingi katika ngazi ya kitaifa. Alisema hakuna takwimu za kielektroniki au hifadhidata inayoweza kuchukuliwa kuwa bora kuliko rekodi hizo. Mahakama pia ilikataa mapendekezo ya kuweka muda maalum wa kuchapisha sajili ya wapigakura, kutangaza vituo vya kupigia kura na kuanzisha mfumo wa kura, ikisema masuala hayo yako ndani ya mamlaka ya IEBC na Bunge. Kuhusu madai ya ubaguzi, Jaji alisema matokeo ya urais yanashughulikiwa tofauti kwa sababu Rais anahitaji kutimiza kiwango maalum cha kitaifa. Uamuzi huo unatarajiwa kuzingatiwa katika mchakato wa kurekebisha sheria za uchaguzi kabla ya uchaguzi wa 2027.
read moretaifaleo.nation.co.ke
@taifaleo 2 hours ago
Sibanduki Jubilee, asema Uhuru akimpokeza Matiang'i uongozi wa chama
RAIS (mstaafu) Uhuru Kenyatta jana alikabidhi rasmi uongozi wa Chama cha Jubilee kwa aliyekuwa Waziri wa Usalama wa Ndani, Dkt Fred Matiang'i, lakini akaeleza kuwa hataondoka katika chama hicho bali atasalia kama mshauri mkuu huku maandalizi ya uchaguzi mkuu wa 2027 yakishika kasi. Akizungumza mbele ya wanachama wa Jubilee baada ya mkutano wa Baraza Kuu la Kitaifa (NEC) kuidhinisha mabadiliko hayo, Bw Kenyatta alisema ataendelea kuhudhuria mikutano ya chama na kutoa ushauri kwa viongozi na wanachama. "Siwezi kuondoka Jubilee, niende wapi? Nitachukua nafasi ya mshauri mkuu. Nitaendelea kuhudhuria mikutano ya Jubilee na kutoa ushauri kama mwanachama mkuu wa chama," alisema. Uhuru alisema hatua hiyo inalenga kutii sheria na kuandaa chama kwa uchaguzi ujao badala ya kujiondoa katika siasa. "Tunaposubiri Mkutano Mkuu wa Kitaifa wa Wajumbe (NDC), Matiang'i ambaye alikuwa naibu wangu atachukua nafasi ya uongozi. Siachi siasa, tunajiandaa kwa uchaguzi ujao," alisema. Hatua hiyo imejiri baada ya Mahakama Kuu kuamua kuwa rais mstaafu hawezi kuendelea kushikilia nafasi rasmi ya uongozi katika chama cha kisiasa kwa muda unaozidi unaoruhusiwa kisheria. Hata hivyo, mahakama ilisema hukumu hiyo haimzuii rais mstaafu kubaki mwanachama wa chama au kushiriki shughuli za kisiasa. Kupitia uamuzi wa NEC, Dkt Matiang'i ameidhinishwa kuwa mrithi wa Bw Kenyatta, hatua ambayo inasubiri kuthibitishwa rasmi na wajumbe wa chama kupitia NDC. "Ninakubali jukumu la kuongoza Chama cha Jubilee," alisema Dkt Matiang'i baada ya kutangazwa kuwa mrithi wa Uhuru. Aidha, Dkt Matiang'i, ambaye tayari amepewa tiketi ya Jubilee kuwania urais mwaka ujao, aliwataka wanachama kushirikiana na vyama vingine vya upinzani ili kuimarisha nafasi ya muungano huo katika uchaguzi ujao. "Huu utakuwa mwaka wa ushirikishaji na wa kufafanua upya uongozi wa nchi yetu," alisema. Hata hivyo, suala la mrithi wa Uhuru halijakosa utata. Naibu kiongozi wa chama Jeremiah Kioni amewahi kuonyesha nia ya kutaka wadhifa huo na kusisitiza kuwa kiongozi achaguliwe kupitia mifumo ya chama. Aliyekuwa Mbunge wa Nyeri Mjini Ngunjiri Wambugu pia ametaka suala hilo liamuliwe na wajumbe wa chama katika NDC. Mbali na masuala ya uongozi wa Jubilee, Bw Kenyatta alirejelea uchaguzi wa urais wa 2022 na kutetea uamuzi wake wa kumuunga mkono aliyekuwa kiongozi wa ODM Raila Odinga. Alipinga madai kwamba, alishindwa kisiasa na Rais William Ruto katika uchaguzi huo. "Wanaposema walinishinda, ni mimi nilikuwa kwenye kura au Raila Odinga? Walinishandaje ilhali nilikuwa tu nikimuunga mkono Raila?" alihoji. Uhuru aliendelea kudai kuwa Raila ndiye aliyeshinda uchaguzi huo licha ya matokeo rasmi yaliyomtangaza Dkt Ruto mshindi. Tume ya IEBC ilimtangaza Dkt Ruto mshindi kwa kura 7,176,141 dhidi ya kura 6,942,930 za Bw Odinga, matokeo yaliyothibitishwa na Mahakama ya Juu. Kauli hizo zilipingwa na viongozi wa UDA. Katibu Mkuu wa chama hicho Hassan Omar alisema matamshi ya Uhuru yanaonyesha bado hajakubali matokeo ya uchaguzi wa mwaka 2022. Wakati huo huo, Bw Kenyatta alipuuzilia mbali madai kwamba analenga kurejea kuwania urais, akisema Katiba inaruhusu mihula miwili pekee na kwamba tayari alihudumu kwa vipindi hivyo viwili. Badala yake, alisema Jubilee inapaswa kujipanga kuandaa wagombea wa nyadhifa mbalimbali kuanzia uwakilishi wa wadi, ubunge, ugavana hadi Seneti, huku ikitafuta mshirika atakayeongoza muungano wa upinzani kwenye kinyang'anyiro cha urais mnamo 2027. Katika mpangilio huo mpya, Uhuru anabaki kuwa na ushawishi mkubwa ndani ya Jubilee akiwa mshauri mkuu, huku Dkt Matiang'i akipewa jukumu la kuendesha shughuli za kila siku za chama na kuongoza kampeni zake za urais kuelekea uchaguzi mkuu wa 2027.
read moretaifaleo.nation.co.ke
@taifaleo 12 hours ago
Mwanablogu kulipwa Sh5 milioni kwa kuvamiwa na polisi
MAHAKAMA Kuu imempa mwanablogu na mtumiaji wa mitandao ya kijamii, Ndiang'ui Kinyagia, fidia ya Sh5 milioni baada ya kubaini kwamba maafisa wa polisi walikiuka haki zake walipovamia nyumba yake, kuipekua, kutwaa mali yake na kumzuia kusafiri kwa uhuru. Katika uamuzi uliotolewa na Jaji Patricia Nyaundi wa Kitengo cha Katiba na Haki za Kibinadamu jijini Nairobi, mahakama ilisema polisi waliingia nyumbani kwa Kinyagia mnamo Juni 21, 2025, bila kibali cha mahakama na bila kuthibitisha kuwa walitimiza masharti ya kufanya upekuzi bila kibali hicho. Jaji Nyaundi alisema maafisa hao walishindwa kuwasilisha sababu zilizoonyesha kwamba kupata kibali cha mahakama kungeathiri au kuchelewesha uchunguzi wao. "Sehemu ya 60 ya Sheria ya Huduma ya Kitaifa ya Polisi si tu tamko la kawaida. Ni kinga ya kikatiba iliyowekwa kisheria ili kulinda haki za wananchi," alisema jaji huyo. Kinyagia, ambaye ni mjasiriamali wa teknolojia na mchangiaji wa masuala ya umma mtandaoni, alipata umaarufu mnamo Juni 2025 baada ya kujificha alipogundua kwamba maafisa wa Idara ya Upelelezi wa Jinai (DCI) walikuwa wakimtafuta kufuatia chapisho la mtandaoni lililohusishwa na maandamano yaliyokuwa yakipangwa dhidi ya serikali. Polisi walikuwa wameanzisha uchunguzi kuhusu ujumbe uliowekwa katika mtandao wa X waliodai ulikuwa wa uchochezi na wenye maudhui ya uasi. Baada ya kufuatilia akaunti hiyo hadi kwa Kinyagia na kupata usaidizi kutoka Mamlaka ya Mawasiliano Kenya, maafisa walielekea nyumbani kwake. Mahakama ilielezwa kwamba polisi walipiga kambi katika makazi hayo kwa muda mrefu kabla ya kuvunja mlango na kuingia ndani waliposhindwa kumpata. Walipekua nyumba hiyo na kuondoka na vifaa mbalimbali huku wakiacha orodha ya vitu vilivyochukuliwa kwa msimamizi wa eneo hilo. Jaji Nyaundi aliamua kuwa hatua hiyo ilikiuka haki za Kinyagia za faragha, mali, utu, usalama wa kibinafsi na uhuru wa kutembea. Mahakama pia ilizuia Mkurugenzi wa Mashtaka ya Umma (DPP) pamoja na polisi kuendelea kumshtaki Kinyagia kuhusiana na uchunguzi huo, ikisema mchakato mzima ulianza kwa vitendo visivyozingatia Katiba.
read moretaifaleo.nation.co.ke
@taifaleo 16 hours ago
Vyombo vya habari Amerika vyamgomea Trump
WASHINGTON, Amerika: TELEVISHENI Amerika Jumatatu zilisitisha kwa pamoja kurusha matangazo ya shughuli za Rais Donald Trump kutoka Ikulu ya White House, baada ya CNN, Politico na MS NOW kuzuiwa kuingia katika jengo hilo. Trump alitangaza marufuku hiyo Ijumaa, akishutumu mashirika hayo kwa 'kuandika habari za kutunga na uongo' kuhusu utawala wake. Vyombo hivyo vilisema waandishi wao walizuiwa kuingia White House mnamo Jumamosi. CNN, Politico na MS NOW baadaye zilitangaza kuwa zitawasilisha kesi dhidi ya utawala wa Trump ili kutetea kanuni kwamba serikali haiwezi kuamua kile ambacho vyombo vya habari vinaripoti. Kufuatia hatua hiyo, White House ilianzisha kituo chake cha matangazo mtandaoni, Trump TV, kinachorusha sehemu za video ya rais saa 24 kwa siku. Vyombo vingine vya habari pia vilisema havitashiriki katika mfumo wa pamoja wa kuripoti shughuli za rais. New York Times na Washington Post, kwa mfano, zilisema hazitachapisha picha za matukio ya Trump. Hatua hiyo ilisababisha kukosekana kwa picha za televisheni za Trump akipanda ndege ya Air Force One au akiwasili New York kuhudhuria Mkutano Mkuu wa Umoja wa Mataifa. Trump pia alishiriki katika hafla ya kuzindua uwanja mpya wa helikopta ya Marine One katika bustani ya White House. Hafla hiyo ilikuwa mbashara kwenye tovuti ya White House, ingawa sauti ya hotuba yake haikusikika. Baadaye rais alionekana kwenye televisheni baada ya kukutana na Meya wa New York Zohran Mamdani. Mamdani alimweleza kuwa waandishi wote wa habari watakaribishwa katika mkutano na wanahabari. Trump alisema hakushtushwa na hatua hiyo, akisema vyombo vya habari vilivyodai vitamsusia havijawahi kufanya hivyo. Mfumo wa ushirikiano wa vyombo vya habari huyawezesha mashirika ya habari kushirikiana ili kupunguza gharama na matumizi ya nafasi wakati wa kuripoti shughuli za rais. Bryan Boughton, mkuu wa afisi ya Fox News Washington, alisema katika barua pepe kuwa mfumo huo hautaendelea kuripoti shughuli za Trump zinazowashirikisha vyombo vyote vya habari. Alisema hatua hiyo ilifuatia White House kuzuia CNN kutekeleza jukumu lake katika ziara ya Trump New York. Siku hiyo hiyo, CNN, Politico na MS NOW ziliwasilisha kesi Mahakamani jijini Washington, zikisema White House ilifuta vibali vya waandishi wao bila kuwapa taarifa wala nafasi ya kujitetea. Vyombo hivyo vilisema hatua hiyo inatishia uhuru wa vyombo vya habari na haki ya umma kupata habari huru bila kuingiliwa na serikali.
read moretaifaleo.nation.co.ke
@taifaleo 18 hours ago
Wakazi wajenga ua kuzunguka ardhi ya chuo baada ya agizo la Ruto
Wanajamii wa eneo la Oloitikosh katika Kaunti ya Kajiado wameanza kuweka ua kuzunguka ekari 60 za ardhi inayomilikiwa na Chuo cha Mafunzo ya Kiufundi cha Kajiado East (TVET), wiki mbili baada ya Rais William Ruto kuagiza ardhi hiyo ilindwe kwa ajili ya upanuzi wa taasisi hiyo. Shughuli ya kuweka ua Jumatatu iliongozwa na Naibu Chifu wa Oloitikosh, Moses Karaine, kwa ushirikiano na wakazi wa eneo hilo. Hatua hiyo imefuatia madai kwamba sehemu kubwa ya ardhi ya awali ya chuo hicho yenye ukubwa wa ekari 76 ilinyakuliwa na kugawanywa na watu binafsi kwa ushirikiano wa mabroka na baadhi ya wanasiasa. Inadaiwa kuwa chuo kilibaki na ekari saba pekee ambako majengo yake yamejengwa. Wakati wa ziara yake ya maendeleo katika eneo hilo wiki mbili zilizopita, Rais Ruto aliamuru ekari 60 zilizokuwa zikizozaniwa ziwekwe ua mara moja ili kuhifadhiwa kwa matumizi ya baadaye ya chuo hicho. "Ardhi hii lazima ilindwe na kuwekwa ua. Nitarudi mwenyewe kukagua maendeleo. Baadaye TVET hii inaweza kukua na kuwa chuo kikuu," alisema Rais wakati wa uzinduzi wa mabweni ya wanafunzi chini ya mpango wa Boma Yangu. Chuo hicho, ambacho kina umri wa miaka 10, kwa sasa kina takriban wanafunzi 800 wanaosomea kozi mbalimbali za kiufundi. Pia ndicho taasisi pekee ya serikali katika Kaunti ya Kajiado iliyo na kituo cha kidijitali cha Jitume Digital Hub. Mkuu wa chuo hicho, Watiri Kiragu, alisifu hatua ya rais akisema kurejeshwa kwa ardhi hiyo kutatoa nafasi muhimu kwa upanuzi wa taasisi hiyo siku zijazo. "Msingi wa upanuzi wa taasisi yoyote ni upatikanaji wa ardhi. Uamuzi huu ni wa manufaa makubwa kwa maendeleo ya chuo," alisema. Mzee Daniel Lepatei, ambaye alipewa jukumu la kusimamia ujenzi wa ua huo, alisema jamii imejitolea kulinda ardhi hiyo kwa manufaa ya vizazi vya sasa na vijavyo. Kwa mujibu wake, mabroka wa ardhi walianza kugawa sehemu ya ardhi hiyo miaka mitano iliyopita na kupata barua za ugavi kwa njia isiyo halali. "Amri ya rais imeokoa mustakabali wa vijana wetu. Fedha za kujenga ua zimepatikana na taratibu za kurejesha ardhi zimekamilika," alisema. Nao viongozi wa jamii walidai kuwa baadhi ya maafisa wa utawala, wanasiasa na maafisa wa ardhi walihusishwa na unyakuzi wa ardhi hiyo. Hata hivyo, Waziri wa Ardhi wa Kaunti ya Kajiado, Hamilton Parseina, alisema barua zote za ugavi zilizokuwa zimetolewa kwa watu binafsi tayari zimefutwa. "Ardhi hii ni mali ya chuo cha TVET. Barua zilizokuwa zimetolewa hapo awali zimebatilishwa ili kuruhusu upanuzi wa taasisi hiyo," alisema. Hatua ya kuzungusha ua ardhi hiyo imepokelewa kwa furaha na wakazi, ambao wanasema italinda rasilimali ya umma wakati ambapo maeneo mengi ya Kitengela yanaendelea kukabiliwa na ongezeko la visa vya unyakuzi wa ardhi ya taasisi za umma.
read moretaifaleo.nation.co.ke
@taifaleo 17 hours ago
Murkomen sasa atangaza vita dhidi ya pombe Baringo
WAZIRI wa Usalama wa Ndani Kipchumba Murkomen amewaamuru maafisa wa usalama katika Kaunti ya Baringo kuimarisha msako dhidi ya pombe haramu na kuwawajibisha wanaohusika na biashara hiyo. Bw Murkomen alisema amepokea ripoti kwamba utengenezaji na uuzaji wa pombe haramu, ikiwemo ile inayodaiwa kuwa na kemikali ya ethanol, umeongezeka Kabarnet na maeneo ya jirani. Akizungumza wikendi wakati wa ibada ya madhehebu mbalimbali katika Shule ya Msingi ya Visa Oshwal, Kabarnet, Bw Murkomen aliwataka maafisa wa usalama kumtafuta mwanamke anayejulikana kwa jina la Targok, ambaye anadaiwa kujihusisha na biashara hiyo. "Nimeambiwa wakuu wa maeneo wamejaribu kukomesha pombe haramu, lakini kuna baadhi ambayo ni mbaya sana, kama yenye kemikali ya ethanol. Nimesikia kuna mwanamke anayeitwa Targok, ambaye ni mtengenezaji na muuzaji wa pombe haramu na mara nyingi hukamatwa na kuachiliwa mahakamani," akasema. Bw Murkomen alimtaka Kamanda wa Polisi wa Kaunti ya Baringo Macharia Wanjau kuhakikisha Targok anakamatwa na kufikishwa mahakamani. Alimweleza Kamishina wa Kaunti ya Baringo Wesley Koech kuwa nafasi yake itakuwa hatarini iwapo maafisa wa usalama watashindwa kukabiliana na biashara hiyo. "Ni jukumu lako kuchagua kati ya Targok maarufu na kazi yako. Chagua kumwokoa yeye au kazi yako," akasema. Wiki moja iliyopita, polisi walivamia boma moja katika kijiji cha Kaprogonya, nje kidogo ya Kabarnet, wakipata kile walichokieleza kuwa chumba cha siri kilichojengwa chini ya sakafu ya bafu. Polisi walikuwa wakimtafuta Targok baada ya kupata taarifa za kijasusi kwamba pombe haramu na kemikali zilikuwa zimefichwa katika boma hilo. Hata hivyo, alikuwa tayari ametoroka walipofika. Baada ya kupekua eneo hilo kwa karibu saa mbili, maafisa waligundua shimo chini ya vigae vya bafu. Ngazi iliwaongoza hadi kwenye chumba cha chini kilichojengwa kama tangi la majitaka. Ndani walipata zaidi ya mitungi 40, kila mmoja ukiwa na kemikali iliyoshukiwa ya ethanol kwa jumla ikiwa zaidi ya lita 1,000. Naibu Kamishina wa Kaunti ya Baringo ya Kati Joseph Ng'eny alisema boma hilo lilionekana kutengenezwa kwa njia maalumu ili kuficha biashara hiyo. "Kwa mtazamo wa kwanza unaweza kudhani hii ni nyumba ya kawaida, lakini tulipoingia tuligundua ilikuwa kiwanda cha kutengeneza pombe haramu," akasema. Mbali na pombe haramu, Bw Murkomen aliwataka machifu na wazee wa vijiji kuacha kushughulikia kesi za ubakaji na kulawiti watoto, akisema washukiwa wanapaswa kukamatwa na kufikishwa kortini. Alisema baadhi ya wahalifu wa unyanyasaji wa kimapenzi ni watu wanaoaminika na familia, wakiwemo jamaa, walimu, wachungaji na watu wengine wenye mamlaka.
read moretaifaleo.nation.co.ke
@taifaleo 23 hours ago
Mnafaa kuheshimu wazee walionitawaza, Kindiki aambia wakosoaji
NAIBU Rais Kithure Kindiki amewataka viongozi wa Mlima Kenya kuwaheshimu wazee na kusikiza wito wao wa umoja, akisema tofauti za kisiasa hazifai kuruhusiwa kuvunja jamii ambayo imeshirikiana kwa miaka mingi. Profesa Kindiki alisema amezingatia kwa uzito wito wa wazee wa kuongoza juhudi za maridhiano na umoja katika eneo hilo kuelekea Uchaguzi Mkuu wa 2027. Alisema ataheshimu mwongozo wa wazee anapozifikia jamii za Mlima Kenya Mashariki na Magharibi katika juhudi za kujenga umoja wa kisiasa. Naibu Rais alisema hayo siku chache baada ya wazee wa Mlima Kenya kukutana katika Uwanja wa Kirigiti, Kaunti ya Kiambu, na kumtawaza kama kigogo wa siasa za eneo hilo. Wazee hao walitoa wito wa umoja miongoni mwa jamii za Agikuyu, Embu, Ameru na Mbeere na kuwataka wakazi wa eneo hilo kubaki na umoja wa kisiasa kuelekea uchaguzi wa 2027. Pia walionyesha kuunga mkono utawala wa Rais William Ruto, hivyo kumpa Profesa Kindiki jukwaa jipya la kuhakikisha eneo hilo linamuunga mkono Rais. Profesa Kindiki alisema viongozi wanapaswa kuheshimu tofauti za kisiasa lakini wasizigeuze kuwa migawanyiko inayolemaza eneo hilo kimaendeleo. Amekuwa akipinga juhudi za kugawanya Mlima Kenya kwa misingi ya Mashariki na Magharibi, akisema jamii hizo zina uhusiano mkubwa wa kihistoria, kitamaduni na kiuchumi kuliko tofauti zao za kisiasa. Wito huo unakuja wakati siasa zikizidi kushika kasi katika eneo hilo, huku makundi hasimu yakitafuta kushawishi mwelekeo wa kisiasa wa eneo hilo kuelekea 2027. Profesa Kindiki alisisitiza atatekeleza maagizo ya wazee kwa kupitia ziara za maendeleo katika Mlima Kenya Mashariki na Magharibi. Baada ya mkutano wa Kirigiti, alikagua ujenzi wa Barabara ya Mukothima-Gaciongo-Gatunga katika eneobunge la Tharaka, Kaunti ya Tharaka Nithi, kabla ya kuhutubia wakazi katika Soko la Gaciongo wakati wa mkutano wa umma. Naibu Rais ameweka barabara, miundombinu na utekelezaji wa mipango ya Serikali kuwa nguzo kuu za ziara zake, akisema uongozi wa kisiasa unapaswa kulenga kuboresha maisha ya wananchi. Wazee wa Kirigiti waliwataka jamii za Mlima Kenya kuwa na msimamo wa pamoja kuhusu masuala yanayoligusa eneo hilo na kukataa juhudi za kuunda makundi tofauti ya kisiasa.
read moretaifaleo.nation.co.ke
@taifaleo 22 hours ago
Makanisa 2 yapigana mahakamani kuhusu umiliki wa jina 'Gospel of God Church'
MAKANISA mawili yameingia katika mzozo wa kisheria kuhusu haki ya kutumia jina "Gospel of God Church", huku rekodi zinazokinzana za usajili zikiwa kiini cha mgogoro wa zaidi ya miongo minne kuhusu utambulisho na mali ya kanisa. Mzozo huo unahusu ni upande upi una haki kisheria kutumia jina hilo na kudai mali zilizopatikana kwa jina hilo. Hii ni baada ya usajili wa mnamo 1968 kufutwa 1985, kisha usajili mpya wa 2004 kabla ya kurejeshewa jina la awali mnamo 2009. Upande mmoja umesajiliwa kama Gospel of God Church (SOC 7670), awali ikijulikana kama African Gospel Church, iliyotambuliwa kisheria mnamo 1968. Upande mwingine ni Gospel of God Church International (SOC 45700), awali ikijulikana kama Glorious Gospel of God Church, iliyosajiliwa mnamo 2004. Mzozo huo umepitia Afisi ya Msajili wa Mashirika, mahakama zinazoshughulikia ardhi na Mahakama Kuu, huku kila upande ukiwasilisha maelezo tofauti kuhusu taasisi ambayo kisheria iliendelea kuwepo baada ya mabadiliko hayo. Mzozo huo pia unahusu ardhi, majengo ya makanisa, magari na mali nyingine zilizopatikana kwa miongo kadhaa. Wiki iliyopita, Jaji Roseline Aburili alitupilia mbali ombi la kikatiba la Gospel of God Church International (SOC 45700), bila kuamua ni upande upi unaomiliki jina hilo au mali zinazobishaniwa. Mahakama ilisema waliowasilisha kesi walipuuza utaratibu wa kisheria wa kukata rufaa baada ya Msajili wa Mashirika kutoa maamuzi Agosti na Oktoba 2024, akiamuru SOC 45700 irejee kwa jina lake la awali, Glorious Gospel of God Church, ndani ya siku 30 au ifutiwe usajili. Chini ya Sheria ya Mashirika, taasisi isiyoridhishwa na uamuzi wa Msajili inapaswa kwanza kukata rufaa kwa Serikali kabla ya kuelekea Mahakama Kuu. "Kwa hivyo, ninapata kwamba ombi hili liliwasilishwa mapema na kupuuza kabisa masharti ya Sheria ya Mashirika," alisema Jaji Aburili. Rekodi za mahakama zinaonyesha Gospel of God Church, SOC 7670, ilianzishwa Kenya 1968 na kupewa msamaha wa usajili Agosti 26 mwaka huo. Mnamo 1985, baada ya serikali kuingilia kati na viongozi wa kigeni kuondoka, wanachama wa Kenya walichagua viongozi wao. Naibu Msajili baadaye alifuta msamaha huo kupitia notisi ya gazeti rasmi. Waliowasilisha kesi walidai hatua hiyo ilimaliza uwepo wa kisheria wa kanisa hilo, na viongozi wa eneo hilo wakasajili Glorious Gospel of God Church of Kenya mnamo 2004. Msajili aliidhinisha mabadiliko ya jina kuwa Gospel of God Church International Machi 22, 2005. Hata hivyo, kundi la awali la Gospel of God Church, SOC 7670, lilirejeshwa katika usajili Novemba 11, 2009. Kundi hilo lilisema ndilo kanisa linalotambuliwa kisheria na lenye haki ya kumiliki mali yenye thamani ya mabilioni ya pesa. Jaji Aburili pia aligundua kuwa makanisa hayo hayakuwa na uwezo wa kufungua kesi kwa majina yao bila kutaja viongozi waliosajiliwa na kutoa idhini ya maandishi. Mahakama hivyo ilitupilia mbali ombi hilo na kuwaelekeza wahusika kufuata kwanza utaratibu wa rufaa.
read moretaifaleo.nation.co.ke
@taifaleo 21 hours ago
Ruto kuangazia masuala ya Kenya akihutubu katika mkutano wa UN
RAIS William Ruto anatarajiwa kutumia hotuba yake katika Mkutano wa 81 wa Baraza Kuu la Umoja wa Mataifa (UNGA) kuangazia masuala ambayo Kenya inayapa kipaumbele hasa yanayohusu amani na usalama. Masuala mengine yanahusu ufadhili wa kukabiliana na mabadiliko ya tabianchi, mageuzi ya UN, usimamizi wa Akili-Unde (AI) na diplomasia ya kiuchumi. Mkutano huo umeanza New York chini ya kaulimbiu "Kurejesha Imani, Kusimamia Mabadiliko: Umoja wa Mataifa Unaotekeleza kwa Wote." Rais Ruto alifika New York Jumamosi na tayari amekutana na Wakenya wanaoishi Amerika akisisitiza wana wajibu muhimu katika maendeleo kupitia uwekezaji, utaalamu na mitandao ya kimataifa. Serikali pia ilizindua Jukwaa la Wakenya wanaoishi Ughaibuni, inayolenga kuwaunganisha Wakenya na kuongeza fursa za uwekezaji nchini. Katika hotuba yake, Ruto anatarajiwa pia kuunga mkono juhudi za kuimarisha ushirikiano wa kimataifa, maendeleo na haki za binadamu, huku akitoa msimamo wa Kenya kuhusu mageuzi ndani ya UN.
read moretaifaleo.nation.co.ke
@taifaleo Tue, 22 Sep 2026 04:55:52
Shahbal njiapanda kuhusu ugavana, akumbushwa 'ana dili nyingi za kibiashara na serikali'
MWEKEZAJI na mwanasiasa Suleiman Shahbal anakabiliwa na changamoto ya kutenganisha mikataba yake ya mabilioni ya pesa katika miradi ya serikali na azma yake ya ugavana Mombasa, huku shinikizo ikizidi kwake ajiondoe kwenye kinyang'anyiro cha 2027. Shinikizo hizo zimezidi kujitokeza wiki chache baada ya kutia saini mkataba wa kuanzisha Eneo Maalum la Kiuchumi (SEZ) jijini Mombasa na kampuni ya kimataifa ya usafirishaji bandarini ya DP World katika Ikulu ya Nairobi. Rais William Ruto awali alikuwa amemshauri Bw Shahbal kuachana na siasa, lakini mfanyabiashara huyo akakataa. Katibu Mkuu wa chama cha United Democratic Alliance (UDA), Bw Omar Hassan, ambaye pia analenga kumng'oa Gavana Abdulswamad Nassir kitini, sasa amesema kuna hatari ya kutokea mgongano wa maslahi iwapo Bw Shahbal atakuwa gavana wa Mombasa huku akiendelea kuwa mshirika mkubwa katika sekta ya biashara ya kaunti hiyo. Mkataba huo wa Sh12 bilioni kati ya kampuni yake ya GulfCap Group na DP World unalenga kujenga Eneo Maalum la Kiuchumi (SEZ) lenye ukubwa wa ekari 535 Jomvu. Ardhi hiyo inamilikiwa na Serikali ya Kaunti ya Mombasa na hapo awali ilikodishwa kwa shirika la Kenya Meat Commission. Mbali na mradi wa SEZ, GulfCap pia inahusika katika ujenzi wa mradi wa nyumba za bei nafuu kwa ushirikiano na serikali ya kaunti mtaani Buxton. Mradi huo wa Sh6 bilioni ulianzishwa wakati wa utawala wa zamani wa kaunti chini ya gavana wa zamani Hassan Joho, ambaye sasa ni Waziri wa Madini na Uchumi wa Baharini, baada ya kubomolewa kwa nyumba za zamani za kaunti. Vilevile, GulfCap ina mradi mwingine kama huo jijini Nairobi. "Ukiwa mfanyabiashara, shikilia biashara na uwaachie wasimamizi wa serikali jukumu la kuweka mifumo na taratibu zinazostahili, kwa sababu una mgongano wa maslahi," Bw Omar alisema. Huku akijipigia debe, Bw Omar alitaja uzoefu wake kama mwanaharakati wa haki za binadamu, seneta wa zamani wa Mombasa na Katibu Mkuu wa UDA kama sehemu ya sifa zake katika kinyang'anyiro cha ugavana. Alisema azma yake ya kisiasa imechochewa na hitaji la kuboresha utawala na kurejesha heshima, hadhi na uzingatiaji wa Katiba Mombasa. Mbunge wa Jomvu, Badi Twalib, pia alimkosoa Bw Shahbal kwa kumpinga Gavana Nassir katika uchaguzi wa 2027, licha ya serikali ya kaunti kumuunga mkono katika mpango wake wa kuendeleza SEZ. "Wale wanaomiliki SEZ wameanza kumpiga vita gavana hata kabla mradi haujaanza. Lakini leo tunawaambia kwamba gavana ataweka siasa kando. Huu sasa ni wakati wa maendeleo. Mtu mnayempiga vita ndiye huyo huyo atakayewanyooshea mkono na kuunga mkono mradi ili maendeleo yaje na watu wapate ajira," alisema. Wakati wa kusainiwa kwa mkataba wa SEZ Septemba 8, Rais Ruto alisema Kenya inahitaji wawekezaji wakubwa, wawekezaji na wajasiriamali makini wenye uwezo wa kutekeleza miradi itakayochangia ukuaji wa uchumi. Hata hivyo, Bw Shahbal alikataa wito wa kuachana na siasa na ameendelea kusisitiza kuwa atawania kiti cha ugavana wa Mombasa mwaka 2027. Hivi majuzi, mbunge huyo wa Bunge la Jumuiya ya Afrika Mashariki (EALA) alieleza wasiwasi kwamba siasa za ugavana zinaweza kuathiri mradi wake na kuwataka wapinzani wake kuweka tofauti zao kando ili kuhakikisha mradi huo unafanikiwa. Bw Shahbal, ambaye ametangaza kuwa hatatafuta tiketi ya ODM kugombea mwaka wa 2027, alimuonya Rais Ruto dhidi ya mipango ya kisiasa ya kugawana maeneo kati ya ODM na UDA, almaarufu kama 'zoning'. "Upuuzi huu wote wa kugawana maeneo umeandaliwa na watu wanaoogopa kuenda mashinani kukutana na watu. Ikiwa una imani na uongozi wako, nenda kwa wananchi uwaambie ulichofanya nao.
read moretaifaleo.nation.co.ke
@taifaleo Tue, 22 Sep 2026 03:55:30
Museveni: Sikujua Jirongo aliaga dunia, tutamkosa, na apumzike kwa amani
RAIS wa Uganda Yoweri Museveni amesema aligundua tu hivi majuzi kwamba aliyekuwa Mbunge wa Lugari, Cyrus Jirongo, alifariki katika ajali ya barabarani Disemba 13, 2025. Museveni alisema Jirongo ndiye aliyemjulisha mnamo 2019 kuhusu Uganda kununua mafuta kutoka Kenya kupitia madalali waliotoza bei ya juu, hali iliyosababisha serikali kupoteza mamilioni ya shilingi. Taarifa hiyo ilimfanya Museveni kumwagiza aliyekuwa Waziri wa Nishati Irene Muloni kuchunguza suala hilo. Siku tano baada ya kumtaja Jirongo na kumwita 'Seneta' ingawa mwanasiasa huyo hakuwahi kuhudumu kama seneta, Museveni alisema hakujua kuwa mwanasiasa huyo alikuwa amefariki. Alimsifu Jirongo kama kiongozi mzuri na mzalendo aliyeitumikia Kenya kwa kujitolea. "Tutamkosa," Museveni alisema, akitoa rambirambi kwa familia, marafiki na wananchi wa Kenya.
read moretaifaleo.nation.co.ke
@taifaleo Tue, 22 Sep 2026 02:55:03
Mahakama yakataa kuachilia wanafunzi 8 wa Utumishi Girls
MAHAKAMA Kuu imekataa ombi la dhamana la wanafunzi wanane wa Utumishi Girls Academy wanaokabiliwa na mashtaka ya mauaji ya wenzao 16 katika mkasa wa moto uliotokea shuleni Mei 28, 2026. Jaji Diana Kavedza-Mochache alisema kuwa kuwaachilia kwa sasa kunaweza kuhatarisha usalama wao, mashahidi na watu wengine wanaohusika katika kesi hiyo, pamoja na kuathiri mwenendo wa kesi. Mahakama ilisema ripoti zinaonyesha baadhi ya wanafunzi hao wamekumbwa na vitisho vya kushambuliwa wakiwa kizuizini, huku wengine wakinyanyaswa mtandaoni. Jaji alisema watoto wanaokabiliwa na sheria bado wana haki za kulindwa, licha ya uzito wa mashtaka. Aliagiza wapokezwe usaidizi wa kisaikolojia na ushauri nasaha.
read moretaifaleo.nation.co.ke
@taifaleo Mon, 21 Sep 2026 16:37:32
Vyeti feki vyanoga miongoni mwa wanaoajiriwa serikalini
WAKENYA wanaotumia vyeti ghushi vya masomo kupata ajira, vyeo na mishahara mikubwa sasa wanaandamwa huku hukumu za hivi majuzi zikifichua jinsi barua hizo zimekuwa zikitumiwa kuingia na kupanda ngazi katika utumishi wa umma. Mnamo Jumatatu, mahakama moja jijini Nairobi ilimpiga faini ya Sh80,000 aliyekuwa afisa msaidizi wa uchaguzi katika Tume Huru ya Uchaguzi na Mipaka (IEBC), George Kipyatich Kibor, baada ya kupatikana na hatia ya kuwasilisha cheti ghushi cha shahada. Bw Kibor aliwasilisha cheti ghushi cha Shahada ya Usimamizi wa Biashara (Fedha na Benki) alichodai kilitolewa na Chuo Kikuu cha Moi. Hukumu yake ilitolewa siku chache baada ya aliyekuwa afisa wa Kampuni ya Kuzalisha Umeme nchini (KenGen), David Mogire Nyabuti, kuhukumiwa kifungo cha miaka 11 kwa kutumia barua ghushi za masomo kupata ajira na kujipatia karibu Sh15 milioni. Bw Nyabuti alitumia cheti ghushi cha Mtihani wa Kitaifa wa Kidato cha Nne(KCSE) na hati ya matokeo kupata nafasi ya kujiunga na Chuo cha Mafunzo cha Kampuni ya Umeme Nchini (KPC) kabla ya kupata ajira KenGen. Tume ya Maadili na Kupambana na Ufisadi (EACC) ilibaini kuwa aliwasilisha barua hizo kama vyeti halali vilivyotolewa na Baraza la Kitaifa la Mitihani Kenya (KNEC). Kati ya Agosti 2003 na Septemba 2018, alipokea Sh14.94 milioni kama mishahara na marupurupu kutokana na udanganyifu huo. Mahakama ilimpata na hatia ya kujipatia mali ya umma kwa njia ya udanganyifu na kumuamuru kurejesha fedha hizo au kutumikia kifungo cha miaka mitano. Pia alipigwa faini ya Sh900,000, huku akikabiliwa na kifungo cha miaka miwili iwapo angeshindwa kulipa. Kesi hizo ni sehemu ya tatizo kubwa la vyeti ghushi katika taasisi za umma. EACC inasema imefikisha mahakamani kesi 90 zinazohusu vyeti ghushi vya masomo. Kati ya hizo, 43 zimeishia wahusika kuhukumiwa, 39 bado zinasubiri kuamuliwa, washukiwa saba waliachiliwa huru na kesi moja iliondolewa. Katika mwaka wa kifedha wa 2025/26 pekee, EACC ilirejesha Sh18.5 milioni zilizolipwa kwa njia ya udanganyifu kwa maafisa wa umma kupitia mishahara iliyotokana na vyeti ghushi na ajira mbili. Miongoni mwa waliopatikana na hatia ni Martin Maigua Maina, aliyedanganya kwa kutumia cheti cha Shahada ya Sanaa katika Sayansi ya Siasa ili kupata cheo IEBC. Jecinter Hezron Adoyo alishtakiwa kwa kughushi barua za masomo kutoka Chuo Kikuu cha Nairobi ili kupata ajira katika Tume ya Ugavi wa Mapato kama mdadisi mkuu na msaidizi wa kibinafsi wa mwenyekiti. Katika Kampuni ya Maji ya Nairobi, Stacy Mwikali alitumia cheti ghushi cha Shahada ya Teknolojia ya Habari alichodai kimetolewa na Chuo Kikuu cha JKUAT kupata cheo cha kaimu meneja kampuni hiyo. Aliyekuwa mfanyakazi wa Kaunti ya Nairobi Gabriel Bukachi Chapia alihukumiwa mwaka jana kifungo cha miaka miwili na nusu, huku akipewa chaguo la kulipa faini ya Sh150,000, baada ya kukiri kughushi vyeti vya masomo. Pia aliamriwa kurejesha Sh3.9 milioni alizopata alipokuwa akifanya kazi katika Hospitali ya Rufaa na Mafunzo ya Moi.
read moretaifaleo.nation.co.ke
@taifaleo Mon, 21 Sep 2026 07:55:25
Kituo kikuu cha kujumuisha kura chazidi kuleta utata kuelekea uchaguzi 2027
ZIKIWA zimesalia miezi 11 kabla ya uchaguzi mkuu wa Agosti 10, 2027, vita vya kisheria kuhusu kuwepo kwa Kituo cha Kitaifa cha Kuhesabu Kura za Urais (NTC) vimeanza kushika kasi, huku macho yakielekezwa kwa Tume Huru ya Uchaguzi na Mipaka (IEBC). Mahakama Kuu inatarajiwa kutoa uamuzi kuhusu uhalali wa kikatiba wa NTC Septemba 22, 2026, kufuatia kesi zilizowasilishwa na Seneta wa Busia Okiya Omtatah pamoja na viongozi wa upinzani wakiongozwa na kiongozi wa Wiper Kalonzo Musyoka na mwenzake wa DCP Rigathi Gachagua. Walalamishi wanataka mahakama itangaze kuwa kuanzishwa na kuendesha NTC kwa ajili ya kuthibitisha tena matokeo ya urais ni kinyume cha Katiba, na hivyo kubatilishwe. Wanadai kuwa katiba inaweka eneobunge kuwa kituo cha msingi na cha mwisho cha kuhesabu, kuthibitisha na kutangaza matokeo ya urais. Wanaopinga NTC pia wanataka IEBC izuiwe kuhesabu tena au kubadilisha matokeo yaliyotangazwa na maafisa wasimamizi wa uchaguzi wa maeneobunge. Aliyekuwa Jaji Mkuu David Maraga ameunga mkono wito wa kuondolewa kwa NTC. "Katiba haitoi nafasi kwa kituo cha kitaifa cha kuhesabia kura. Jukumu la IEBC ni kutangaza matokeo, wala si kuhesabu kura tena," akasema Maraga. Hata hivyo, msimamo huo unatofautiana na uamuzi wa Mahakama ya Juu katika kesi ya uchaguzi wa urais wa 2017. Mahakama hiyo ilisema IEBC ina jukumu la kujumuisha na kuthibitisha kura kabla ya kutangaza mshindi, huku mchakato huo ukiendelea kutoka kituo cha kupigia kura hadi eneobunge na hatimaye NTC. Katika kesi ya 2022, Mahakama ya Juu ilifafanua kuwa jukumu la kuhesabu na kuthibitisha matokeo katika NTC ni la IEBC kama taasisi, huku mamlaka ya kutangaza mshindi yakiwa ya mwenyekiti wa tume. Aliyekuwa Mwanasheria Mkuu Justin Muturi na aliyekuwa rais wa Chama cha Mawakili (LSK) Nelson Havi pia wameunga mkono kuondolewa kwa NTC, wakisema matokeo yaliyohesabiwa na kutangazwa katika maeneobunge 290 yanapaswa kuwa ya mwisho. Kwa upande mwingine, aliyekuwa kamishIna wa IEBC Paul Kurgat anasema Katiba haijaweka jengo maalumu kuwa kituo cha kuhesabia kura, bali inasimamia mchakato. Anasema Kanuni za Uchaguzi zinahitaji kuhesabiwa kwa kura kikamilike katika kituo kilichotangazwa rasmi na IEBC. Mzozo huo sasa unahusu zaidi ya eneo la Bomas, kwani kesi hizo zinahoji iwapo IEBC ina mamlaka ya kikatiba na kisheria kuthibitisha matokeo ya urais katika ngazi ya kitaifa baada ya kutangazwa katika maeneo bunge. Kwa kuzingatia uwezekano wa suala hilo kufikishwa Mahakama ya Juu, uamuzi wa Mahakama Kuu unaweza kuwa hatua ya kwanza katika vita virefu vya kisheria kuhusu mfumo wa kuhesabu na kuthibitisha matokeo ya urais kuelekea uchaguzi wa 2027.
read moreRight Column Content